كذب من قال موج البحر خاين والبحر غدار
أنا في عيني أمواجه قبر..
أدفن بها أسراري لك الله يابحر ...
من وين جبت الصبر ياصبار
أنا صبري عجز لا يكتم اللي شفت بأقداري
أنا يابحر همي ساحلك .. والمركب الدوار
يسوق الموج للمينا ..وتصدم في صخر ظاري
أنا مدك .وجزرك .والهوى.والليل.والأنوار
طلبتك يابحر نزل شراعك .. واسمع أخباري
أنا شلت الغرام اللي سنين العمر به تحتار
وتهت وضعت بين المستحيل .. وبين إصراري
سريت الليل وأثر الليل ناوي يفضح الأسرار
وأثاري كل ليل مرني من فرحتي ... عاري
سريت الليل أنا يابحر ... كن النجم لي سمار
ووصلت لشطك الظالم ولاأدري وين مشواري
أنا مااذكر من الرحله . . سوى دمع هما مدرار
ومجداف رميته في ظلامك .. جيت به ساري
أنا غصن ظلمه الوقت .. ماعدت عليه أمطار
رداة الحظ خلتني .. (أعيش آطارد آثاري)!!
أنا أدري مابيدينك فرح .. تعطيني عليه إقرار
وأناأدري إن السكوت أرحم من الشكوى لجزاري
أنا جيتك أبي أخمد على شاطيك بعض النار
وأثر حالك مثل حالي .. تعاني الجرح وتداري
بحر .. بالله توعدني وعد .. لا تفضح الأسرار
يهون الموت بأمواجك ... ولا تتشتت أسراري